د ننګرهار وادي کرنیز ریاست د خرماوو په حاصلاتو کې به د نورو کالنو په پرته سږ کال درې برابره ډیروالی راشي.

د هډې فارم آمر انجنیر سید آغا میاخیل د ننګرهار وادي کرنیز ریاست رییس محمد بصیر حقیار ته د هډې فارم څخه د لیدو پرمهال وویل: «سږ کال به د اټکل له مخې د تیر کال په پرتله ددغه بڼ د خرماوو حاصلات درې برابره زیات شی، تېر کال يې حاصلات پنځه ټنه و سږ کال به ۱۵ ټنه ورسیږي.»

د خرماوو دغه بڼ چې د هډې فارم په دویم بلاک کې موقعیت لري په ۴۰ جریبه ځمکه کې يې په زرهاوو بوټي کرل شوي دي.

د یادونې وړ ده چې د ملي پراختیا شرکت اړوند ننګرهار وادي کرنیز ریاست په پلان کې لري چې په ۱۸۰ جریبه ځمکه باندي یو بل د خرماوو بڼ هم جوړ کړي.

د ملي پراختیا شرکت رهبري پلاوي او د جمهوري ریاست عملیاتي ادارې تخنیکي مرستیال له یوشمیر پروژو څخه دلیدنې په موخه ننګرهار ولایت ته سفر کړی.

په دغه سفر کې د ملي پراختیا عمومي اجراییوي رییس عبدالرحمن عطاش چې عملیاتي او تجارتي مرستیال ریاض الدین شریفي، د جمهوري ریاست عملیاتي ادارې تخنیکي مرستیال وحید رحمدل او یوشمیر نور رییسان یې ملتیا کوي ننګرهار ولایت ته رسیدلی دی.

دغه پلاوي له یوشمیر زراعتي پروژو، ختیځ ۶۰۰ بستریز روغتیایی کمپلکس او د ننګرهار وادي کرنیز ریاست له ځینوبرخو څخه د ليدنې ترڅنګ اړونده مسؤلینو ته لارښوونه وکړه چې د زراعتي او و دانیزو پروژو کیفیت ته لازمه پاملرنه وکړي.

دغه سفر په داسې حال کې ترسره کیږي چې څه موده وړاندې یاد شوي پلاوي د هیواد شمال ته له یوشیمر ترکار لاندې پروژو څخه د لیدنې په موخه هم سفر کړی وو.

د ننګرهار وادي کرنیز ریاست مسؤلینو دعبدالخېلو بلاک کې د غنمو د تریشل له چارو څخه د لیدنې پرمهال ددې ولایت بزګرانوته د اصلاح شوو تخمونو د تولید خبر ورکوي او وایي چې تېر کال اصلاح شوي تخمونه د کرنې او اوبولګولو وزارت په همکارۍ له کندز ولايت څخه ختیځ ته راوړل کېدل، په داسې حال کې چې اوس ننګرهار وادي کرنيز رياست دغه تشه ډکوي او نور به د ختيځ زون لپاره په پوره اندازه اصلاح شوي تخمونه په خپله تولید او بزګرانو ته په واک کې ورکړي، چې دغه چاره په ختیځ زون کې دځان بساینې په لورغټ ګام ده .

دننګرهار وادي کرنیز ریاست رییس محمد بصیر حقیار وایي دوی د ننګرهار وادي کرنيز رياست د اصلاح شوو تخمونو د کر لپاره د هډې فارم عبدالخېلو بلاك کې ۴۷۶ جریبه ځمکه د یو پروتوکول له مخې ودان کرنیزشرکت ته ورکړې، چي ۵۱ سلنه د ننګرهار وادي کرنیز ریاست او ۴۹ سلنه به یې یاد شرکت اخلي

دغه راز د ننګرهار کرنیز ریاست مسؤلینو د ودان کرنیز شرکت له مسؤل او د عبدالخېلو سیمې له مشرانو سره د غنمو د کرکیلې او په مناسب او خوندي ځای کې د اصلاح شوو تخمونو د ځای پرځای کیدوسپارښتنه وکړه.

دملي پراختیا شرکت د نورو فعالیتونو په دوام د ننګرهار وادي کرنیز ریاست اړوند ځمکوکې د ۱۰۰۰ په شاوخواکې د شنو خونو جوړولو هوډ لري، چې اوس مهال پر ۲۰۰ هغویې کار روان ده او تردې مهاله څه د پاسه ۶۲ شنې خونې جوړې اوګټې اخیستنې ته چمتوشوې دي .

دننګرهار وادي کرنیز ریاست مسؤلین وایي دوی هڅه کوي، چې ددې شنو خونو په جوړولو سره تولیدات لوړ او د بیکارۍ کچه راټیټه کړي.

اوسمهال دننګرهار وادي کرنیز ریاست دهډې فارم په شنو خونوکې د بادرنګو، رومي بادنجانو، دلمه مرچو او ټینډو حاصلات خرڅلاو ته تیارشوي،چې په وینا یې له دې شنو خونو څخه به په یوفصل کې څه دپاسه ۱۸ میلیونه افغانۍ عواید تر لاسه شي .

دا په داسې حال کې ده چې په ملي پراختیا شرکت کې دننګرهار وادي کرنیز ریاست په مدغم کیدو سره، په یاد ریاست کې د پخوا په پرتله کارونه منظم،مسلکي،چټک اوبهتر شوي دي.

د ننګرهار کرنیز وداي ریاست ته نوی رییس ښاغلی محمد بصیرحقیار د یوې پراخې غونډې پرمهال د دغه ریاست کارکونکو او د ننګرهار ولايت مقام ته وپېژندل شو او رسماً يې دنده پيل کړه.

د پېژندلو په دې غونډه کې د ملي پراختیا شرکت تجاري مرستیال عبدالمومن منصور، د بشري سرچینو آمر محب الرحمن رحیمي، د کانال مرستیال ذبیح الله فضلي، د ADB مسوولینو او ګڼ شمېر نورو چارواکو او مسوولینو ګډون کړی وه.

د ملي پراختیا شرکت تجاري مرستیال عبدالمومن منصور په یاده غوڼډه کې وویل: ملي پراختیا شرکت رهبري د خپلو تولیداتو زیاتوالي، پراختیا، عوایدو لوړوالي، د بې روزګارۍ د کچې ټيټوالي او د ننګرهار کرنیز ریاست له ځمکو او امکاناتو څخه سالمې ګټې اخستنې ته پوره او جدي پاملرنه لري.

د ملي پراختیا شرکت اړوند ننګرهار کانال شرکت د ۹۱ تنو متقاعدو کارکوونکو په ویاړ ستاینغونډه او مخه ښې مراسم ترسره شوه.

پدغو ۹۱ تنو کې ۷۴ تنه کارګر او ۱۷ تنه مامورین شامل دي د خپل خواږه عمرزیاته برخه يې د کانال ادارې ساتنې، پالنې او غوړېدا ته کار کړی او خپله خوږه ځواني يې په کې تېره کړې.

ننۍغونډه چې د ننګرهار کانال شرکت ریاست انګړ کې جوړه شوی وه ددغې شرکت سرپرست او مرستیال انجنیر ذبیح الله فضلي وویل: ستاسې له برکته نن د ملي پراختیا شرکت اړوند ننګرهار کانال شرکت ۵۵ زره جریبه ځمکه په واک کې لرو، دغه شرکت به ستاسې کړي خدمتونه هېڅکله هېر نه کړي او ستاسو مشورو او پلانونو ته به د عمل جامه ورپه تن کړي.

د متقاعدو مامورینو په استازولۍ د ننګرهار کانال شرکت متقاعد منابع بشري مدیر هدایت الله او د متقاعدو کارګرو په استازولۍ ګل داد خان خبرې وکړې او د ملي پراختیا شرکت د رهبرۍ او ننګرهارکانال شرکت ریاست نه يې مننه وکړه چې زموږ لپاره يې ستاینغونډه او مخه ښې مراسم ترتیب کړي وه، دوي زیاته کړه موږ به لدې وروسته هم خپل مشورې او نظرونه د کانال شرکت د بهبود لپاره د رهبرۍ او اړونده امریتونو سره شرېکوو.

د غونډه په پای کې پرمتقاعدو ۹۱ تنو کارکوونکو ستاینلیکونه وویشل شوه او د کارګرو اتحاديي له لوري د ننګرهارکانال شرکت سرپرست ته د اعزاز لونګۍ هم ورپه سر شوه.

په ننګرهار کې صنعتي او فرهنګي اونۍ د بزګر جشن په لمانځلو او د وطني توليداتو نندارتون په پرانیستلو سره پيل شوه چې په کې د ننګرهار والي، ننګرهار کانال شركت رهبرۍ او نورو مسوولينو، د ولايت مرستيالانو، د ادارو مسئولينو، ولایتي شورا غړو، بزګرانو او سلګونو نورو بېلابېلو قشرونو ګډون کړی و چې د ويناو سربېره په کې د بزګر اړوند ترانې، تياتر، اتڼ نندارې او نورې مېلې تر سره شوې.

د ننګرهار والي ضياءالحق امرخېل د نوي کال او بزګر ورځې له امله ټولوهېوادوالو او بزګرانو ته مبارکي ورکړه، هيله يې وښوده چې سږنی کال د سولې، امن او ابادۍ په پيلامې بزګر لپاره د ځانګړو پرمختګونو او لاسته راوړنو ډک کال اوسې.

نوموړي زياته کړه، چې د نوي کال په مناسبت يې صنعتي او فرهنګي اونۍ پيل کړې، چې په ۱۲۰ غرفو کې بېلابېل وطني توليدات، خواړه، تاريخي اثار او نور توکي نندارې ته ايښودلي شوي .

د ننګرهار کانال شرکت سرپرست ريس ذبيح الله فضلي د نندارتون څخه د لېدنې پر مهال وويل، چې بزګر د ټولنې هغه قشر دی چې د خپلو لاسونو په تڼاکو کولو، خولو تويولو او ستړياو ګاللو سره د ټولنې د نورو قشرونو دسترخوان ډک ساتي، له همدې امله يې ډاډ ورکړ چې ۱۴۰۰م کال به د ننګرهار کانال شركت د پرمختګ او غوړېدا کال وي.

د ننګرهار والي او د نندارتون برخه والو د کانال شرکت له لوري نندارې ته اېښودل شوي تولېدات خوښ کړل او ستاينه يې وکړه.

د ننګرهار کانال د هډې فارم میلمستون او رستورانټ چې د څو کلونو را پدیخوا غېر فعال وه په عصري وسایلو او سیستمونو سمبال بیا ځلي فعالېږي.

یاد میلمستون ۱۶ د هستوګنې خوني او یاد رستورانټ دوه تالارونه، شین چمن او اړین محلقات لري

دغه دواړه تعمیرونه په ۱۳۴۲ ه ش کال کې هغه مهال د بهرنیو او د وخت چارواکو لپاره جوړ شوي کومو چې به د کانال څخه لېدنه کوله او د کانال د پراختیا او سمون لپاره به یې برنامې جوړولی.

په یاد میلمستون او رستورانټ کې به د ننګرهار کانال پرسونل په منظم توګه غونډې، ناستې، کنفرانسونه او ورکشاپونه ترسره کوي.

د ننګرهار کانال شرکت مسوولین ددغه شرکت هډې فارم امریت دوهم بلاک کې د شنو خونو د حاصلاتو د رسېدو خبر ورکوي او وایي چې ډېر ژر به بازار ته وړاندې شي.

د ننګرهار کانال شرکت سرپرست او مرستیال انجنیر ذبیح الله فضلي وايي، چې د ننګرهار کانال شرکت په شنوخونو کې بادرنګ، ټندۍ، دولمه مرچ، رومیان کرل شوي دي، چې اوس مهال د بادرنګو او ټنډیو حاصلات رسېدلي دي او نږدو ورځو کې به د درنو هېوادوالو خدمت ته هم وړاندې شي.

د فضلي په ټکو چې نورو کلونو کې به دهېواد دنورو ولایتونو تر څنګ ان له همسایه هېوادونو هم بادرنګ دې ولایت ته وارېدېدل، خوسږکال به د ننګرهار کانال شرکت د شنو خونو له دودېدو سره سم اوس د جلال آباد ښار هټیوال او د سبزیجاتو کاروباریان تر ډېره بریده اړنه وي ، چې د نورو ولایتونو او هېوادونو محصولات وپلوري او رايې وړي .

د فضلي په وینا : د ملي پراختیا شرکت برخې یانې ننګرهار کانال شرکت هلې ځلې کوي تر څو په هر موسم کې تازه سبزیجات مارکېټ ته وړاندې کړي. چې له نېکه مرغه سږکال د د هډې فارم بادرنګ، ټنډۍ او نور د کال په دې موسم کې بازار ته وړاندې شي .

د کرنې د برخې د کارپوهانو په وینا چې ننګرهار د هېواد په ختیځ کې پروت ولایت چې په زیاته اندازه خلک یې په کرنه او مالدارۍ بوخت دي؛ که چېرې په دې ولایت کې شنې خونې زیاتې شې یاد ولایت به د سبو، سبزیجاتو او ترکاریو په برخه کې پر ځان بسیا شي او ورسره سم به کاري فرصتونه هم زیات شي.